Nan lesson sa a, nou pral aprann enpotans bagay ki rele tan sou planèt tè a. Nou pral gade kisa yon evènman ye, ki moun ki sous evènman yo ki kompoze istwa planèt tè a. Pou nou fini, nou pral aprann kisa etènite ye.
Gal 4:1-4. Enben! Men sa m’ vle di: Pitit ki pou resevwa byen papa li a, toutotan li piti toujou, y’ap trete l’ menm jan yo trete yon esklav, atout se li menm ki mèt tout bagay. Toutotan li timoun toujou, li sou lòd moun k’ap okipe l’ la, moun k’ap regle zafè l’ pou li a, jouk lè papa a te fikse a rive. Nou menm tou, toutotan nou te tankou timoun, nou te esklav tout lide ki t’ap mennen lèzòm nan lemonn. Men, lè lè a rive, Bondye te voye pwòp pitit li. Li soti nan vant yon fanm, li viv anba lalwa jwif yo, pou l’ te ka delivre tout moun ki te anba lalwa pou n’ te kapab vin pitit Bondye.
Mk 1:14-15. Apre yo te fin mete Jan nan prizon, Jezi ale nan peyi Galile pou l’ te fè konnen Bon Nouvèl Bondye voye a. Li t’ap di yo konsa: -lè a rive. Koulye a, Bondye ki wa nan syèl la ap vin pran pouvwa a nan men li. Tounen vin jwenn Bondye. Asepte Bon Nouvèl la.
Ac 17:24-26. Bondye ki fè lemonn antye ak tou sa ki ladan l’, se li menm ki Mèt syèl la ak tè a. Li pa rete nan kay moun bati ak men yo. Li pa bezwen pou moun travay ba l’ anyen non plis, paske se li menm ki bay moun lavi, ki fè yo respire, ki ba yo tout lòt bagay. Se li menm tou ki kreye tout nasyon ki rete toupatou sou latè. Li fè yo tout soti nan yon sèl moun. Li te fikse davans tan ki pou yo chak, ak limit kote pou yo chak rete.
