4. ROL BONDYE PITIT LA NAN SALI PECHE YO
Tout sa nou bezwen pou n’ ka sove Bondye papa a bay nou yo nan Jezi. Nan Efe 1:3 nou li: “Lwanj pou Bondye, Papa Jezikri, Seyè nou an. Se li menm ki beni nou nan lavi n’ap mennen ansanm nan Kris la.Li ban nou tout kalite benediksyon espirityèl nan syèl yo.” Pou yon pechè jwen benediksyon sa yo, pechè a dwe anndan Jezi. Se Bondye ki mete yon pechè ki te meprize l’ nan Jezi. Nan 1Ko 1:30-31 Sentespri a deklare: “Bondye mete nou ansanm ak Jezikri, li fè Kris la tounen bon konprann pou nou. Se Kris la ki jistis nou. Se li menm k’ap fè nou viv apa pou Bondye, se li menm ki delivre nou. Konsa, jan sa ekri nan Liv la: Si yon moun vle fè lwanj tèt li, se pou l’ fè lwanj tèt li nan sa Bondye fè pou li.” Se nan Jezi Bondye fè tout pechè yo li sove vin inosan devan l;, li Rom 5:1-2.
Nan 2Ko 5:20 Sentespri a di nou “Kris la pa t’ janm fè okenn peche, men Bondye fè l’ pran sò nou sou li, yo trete l’ tankou yon moun ki fè peche. Konsa, nou vin inosan lè nou fè yon sèl kò ak Kris la.” Se lè nou kwè nan Pitit la Nou fè yon sèl kò ak li. Se Pitit la ki retire nou anba kòlè Papa a. Nan Jan 3:36 nou li: “Moun ki mete konfyans yo nan Pitit la, yo gen lavi ki p’ap janm fini an. Moun ki desobeyi Pitit la, yo p’ap gen lavi sa a. Se kòlè Bondye k’ap tonbe sou yo.” Se Pitit la ki bay nou pouvwa pou n’ vin pitit Bondye. Se nan Pitit la Papa adopte pechè yo li sove. Nan Jan 1:12-13 nou li: “Men, sa ki te resevwa l’ yo, sa ki te kwè nan li yo, li ba yo pouvwa pou yo vin pitit Bondye. Yo pa t’ vin pitit Bondye jan sa fèt pami lèzòm sou latè, paske sa pa t’ soti nan egzijans lachè, ni nan volonte lèzòm. Se Bondye menm ki fè yo fèt.” Nan Efe 1:5 nou li: “Bondye te deside depi davans pou l’ te adopte nou pou pitit li nan Jezikri, paske sa te fè l’ plezi.” Nan Jan 14:6 Jezi declare: “… Se mwen menm ki chemen an. Se mwen menm ki verite a, se mwen menm ki lavi a. Pesonn pa ka al jwenn Papa a si li pa pase nan mwen
Sous Sali levanjil ki levanjil tout bon an se pa yon relijyon, se pa yon legliz, se “Kris yo te kloure sou kwa a. Pou jwif yo, sa se yon wòch k’ap fè yo bite. Pou moun ki pa jwif yo, sa se bagay moun fou. Men pou tout moun sa yo Bondye rele kit yo jwif, kit yo pa jwif Kris la se pouvwa Bondye li se bonkonprann Bondye.” (1Ko 1:23-24). Se sak fè levanjil ki levanjil tout bon an dwe mennen moun ale jwen Jezi. nan Jan 6:45 Jezi deklare: “… Tout moun ki koute Papa a, ki asepte tou sa l’ moutre yo, y’ap vin jwenn mwen.” Jezi fè deklarasyon sa a paske se li ki sèl chemen ki mennen yon pechè nan prezans papa l’. Pou yon pechè sove Bondye dwe mennen pechè a bay Jezi, li dwe bay pechè a lafwa pou pechè a kwè nan jezi.
