AK KI ZOUTI BONDYE PAPA A SEVI LE L’AP SOVE YON PECHE?
Lè Bondye ape sove yon pechè li itilize levanjil la, ki pouvwa li, pou l’ ouvè je espirityèl pechè a pou pechè a ka konnen nan ki eta li ye. Nan Rom 1:16 nou li: “Mwen pa wont anonse bon nouvèl la: se pouvwa Bondye ki la pou delivre tout moun ki kwè, jwif yo an premye, apre yo moun lòt nasyon yo tou.” Nan vèsè 17 la Sentespri a di nou, nan levanjil la Bondye devwale kouman li fè yon pechè vin inosan devan li. Inosan devan Bondye egal sove paske se sèl moun yo Bondye deklare inosan li sove. Inosan devan Bondye se kondisyon tout pechè dwe ye pou yo kapab antre nan prezans Bondye.
Jistificasyon yon pechè pa depann de bon zèv li fè. Nan Lik18:10-14 Nou li: “Dezòm moute nan tanp lan al lapriyè. Yonn te yon farizyen, lòt la yon pèseptè kontribisyon. Farizyen an te kanpe apa, li t’ap lapriyè konsa: Bondye, m’ap di ou mèsi dapre mwen pa vòlò, ni visye, ni adiltè tankou lòt yo; mèsi dapre mwen pa tankou pèseptè kontribisyon sa a. Chak senmenn mwen pase de jou ap fè jèn, mwen bay ladim nan tou sa mwen genyen. Pèseptè kontribisyon an menm te rete dèyè, li pa t’ menm gen kouraj leve je l’ nan syèl; li t’ap bat lestonmak li, li t’ap di: Bondye, gen pitye pou mwen ki fè anpil peche. Lè sa a, Jezi di yo: M’ap di nou sa, se pa farizyen an non, men se pèseptè kontribisyon an ki tounen lakay li ak padon Bondye. Paske, yon moun ki vle leve tèt li, y’a desann li, yon moun ki desann tèt li, y’a leve li.” Pèseptè kontribisyon an te konnen nan ki eta li ye, li pa t’ konte sou bonte li. Li te konte sou gras Bondye pou l’ vin inosan devan Bondye.
Nan V14 la, se mo Grek (dikaioo) ki vle di (justifier, paraître juste, trouvé juste) moun yo ki ban nou Bib Kreyol la tradui (padon Bondye). Padon pa menm bagay ak jistifikasyon—deklare inosan. Nan 1Jan 1:9 nou li: “Men, si nou rekonèt devan Bondye nou fè peche, nou mèt gen konfyans nan li. Paske l’ap fè sak gen pou fèt la: la padonnen tout peche nou yo, la netwaye nou anba tou sa ki mal.” Pechè yo Bondye declare inosan, li declare yo inosan yon sèl fwa pou tout tan. Se sèl jistis Jezi ki kapab mete yon pechè nan kondisyon sa a. Nan Ebr 10:14 nou li: “Konsa, avèk sèl ofrann li fè a, li fè moun li netwaye anba peche yo bon nèt pou tout tan.”
Se san Jezi ki fè Bondye kapab deklare yon pechè ki merite kondanasyon inosan. Nan Rom 5:9 nou li: “Se paske li bay san li pou nou kifè koulye a Bondye deklare nou inosan. Nou pa bezwen mande si Kris la p’ap delivre nou tou anba kòlè Bondye.
Tout moun bezwen jistis Jezi paske nan Rom 3:10-12 Sentespria di nou: “Jan sa ekri nan Liv la: Nanpwen moun ki inosan devan Bondye. Non, pa menm yon grenn. Yo yonn pa gen konprann. Yo yonn p’ap chache Bondye. Yo tout lage kò yo nan bwa, yo tout pèdi chemen yo. Nanpwen yonn ladan yo k’ap fè sa ki byen. Non, pa menm yon sèl.” Se sak fè nan Lik 19:10 nou li: “Moun Bondye voye nan lachè a vin chache sa ki te pèdi pou l’ delivre yo.”
